nataragung.id – Teginenong – Mak unyin hanipian gham, peghal-lu dicawako jama jelema ghamik. Wat kehagaan gham sai justru tuwoh lebih kuat ketika disippon menong-menong delom hati, di isik temon-temon, terus dicakakko haguk Allah melalui du’a-du’a sai tulus. Sebab jelema mak selalu ngedok hati sai gegoh; wat sai nutuk bahagia lamon ngenah keberhasilan ulun baghih, tapi wat munih sai nyippon ghasa ighi sai mak tenah-han.
Ulun-ulun sai bijak seghani na cawa:
اسْتَعِينُوا عَلَى قَضَاءِ حَوَائِجِكُمْ بِالْكِتْمَانِ، فَإِنَّ كُلَّ ذِي نِعْمَةٍ مَحْسُودٌ
Ghat-ti ni: “Kilu tulunglah guway mewujudko kecukupan kuti ghuppok suwa bejamuk, ulah sekedaw nikmat haga di hasadi.”
Ulah sina, ngejaga sebagian haghopan jama ghik rencana hughik, ge-ghing jadi bentuk kebijaksanaan. Layin ulah ghabai gagal tapi tagan hati tetop fokus jama usaha, layin sibuk nyepok pengakuan jelema baghih.
Terlalu nayah nyeghita ko rencana kadang ngeguway semangat lemoh semakkung tujuan temon-temon tercapai.
Tinuk lah picawi memanuk teham-bogh ghang-ngal guk langik. Ia mak ngeguway keghamaian semakkung ngebentang ko kepi ni. Ia nguatko dighi ni suwa menong, hingga akhir ni dapok nembus beghak ni langik.
Gohna munih jelema; keberhasilan ge-ghing lahegh anjak ketekunan sai menong-menong, layin anjak nayah ni cawaan sai di umbar.
Delom kisah Nabi Yusuf ‘alaihis salam ngedok pelajaghan balak tentang penting ni ngejaga ghahasia. Nabi Ya’qub kilu jama anak ni guway mak nyeghita ko hanipian ni jama kaban puaghi-puaghi ni tagan tehindar anjak makar ghik kedengkian.
Nabi Ya’qub ‘alaihis salam anjak cawa jama Nabi Yusuf:
{ قَالَ یَـٰبُنَیَّ لَا تَقۡصُصۡ رُءۡیَاكَ عَلَىٰۤ إِخۡوَتِكَ فَیَكِیدُوا۟ لَكَ كَیۡدًاۖ إِنَّ ٱلشَّیۡطَـٰنَ لِلۡإِنسَـٰنِ عَدُوࣱّ مُّبِینࣱ }
“Wahai anakku, danglah niku nyeghitako hanipi mu jama kaban puaghi mu, natti tiyan ngeguway makar jama niku.” (QS. Yusuf: 5)
Anjak san gham belajagh, bahwa mak unyin nikmat jama haghopan peghal-lu di umbar semakkung wattu ni ghatong.
Nayah ulun gagal layin mak sang-ngup, tapi ulah sibuk nyawako rencana guk jelema baghih ketim-bang nge-ghajja ko. Sebalik ni, nayah sai balak hasil ni, anjak kesabaghan, keghaj-ja keghas ghik du’a sai di lakuko tanpa ghituk-ghituk nyeppok perhatian kaban jelema.
Mula ni, lamon kuti wat cita-cita atau kehagaan sai balak jagalah ia, gegoh jelema ngejaga benih sai paling betik. Rawat jama usaha, sigham jama du’a ghik lindungi jama keikhlasan. Taganko wattu ghik takdir Allah sai natti ngen-nah ko hasil ni jama dunia. (*/250)
WaAllahu A’lam
_____
📚 H. Komiruddin Imron, Lc
✒️Shabahul_Khair
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.
#KIS
#Shobahul_khair
#Mutiara_Pagi