nataragung.id – Teginenong – Suasana arisan di Tiyuh Sekhab-ba Mukkin de-khani sina cukup khamik. Suwa nginum kupi jama nganik bebuwak. Se-khadu unyin peserta kuppul, kaban mak-mak ngobrol setehalu ni obrolan.
Bu Eka:
“Mak-mak, kak khadu massa uloman anjak Pak Ahmad Sumartono api makkung?”
“Undangan api, Bu Eka? Nge-khuwah, ulang tahun, api syukuran?” Tim-mbal Bu Nani penasaran.
Bu Eka:
“Layin. Pak Ahmad haga kawwin luwot. Kabakh ni Bu Nana, kebayan ni pesai, sai ngejuk izin. Soalni tiyan kak kawwin happekh puluh tahun makkung ngedok anak.”
Kaban mak-mak langsung khituk nengis ni.
“Aduh… nyak, paling mak ge-khing lamun mengiyanku poligami atawa kawwin luwot, cawa Bu Ririn.
“Nyak munih, lamon mengiyanku bekhani poligami, lebih betik nyak kilu cekhai anjak mengiyanku,” tim-mbal Bu Susi.
Bu Erna nutuk cawa.
“Tekhus-tekhang nyak makkung lekot ngenah ulun sai poligami temon-temon nyaman atawa bahagia. Sai ge-khing ditengis justru delom keluarga tiyan, khituk tekhus pekhadda kebayan ni.”
“Lamun nyak, apipun alasan ni, nyak mak sudi di madu,” cawa Bu Ijah tenah-han emosi.
Unyin mak-mak ngangguk setuju. Cuma kebayan ustadz Munawwar sai anjak jeno mennong gawoh suwa sengah-sengih.
Bu Asni:
“Bu Ustazd, anjak jeno lahapi cuma sengah-sengih gawoh. Cuba jelasko, api sebenokh ni pandangan menurut Islam ngeliak poligami sa.”
Kebayan Ustazd Munawwar ngejawab kalem.
Bu Ustazd:
“Mak-mak, nyak cuma haga ngekhu-lusko pemahaman kham. Poligami sangun pekakha sensitif. Nengis ni gawoh ngeguway hati kaban kebayan mak nyaman.Tapi sebagai umat Islam, kham wajib ngen-nah ni sesuai syariat Allah, layin cuma nutuk pekhasaan gawoh.”
“Delom Islam, poligami hukum ni mubah, khat-ti ni dapok. Layin wajib, layin munih sunnah guway kaban kha-gah. Islam cuma ngejuk ruang guway kaban kha-gah sai sangun ngebutuh ko khik sang-ngup memenuhi syakhat-syakhat ni. Syakhat ni munih biyak yaitu adil.”
Tekhus Kebayan Ustadz Munawwar ngebacako firman Allah:
«فَإِنْ خِفْتُمْ أَلَّا تَعْدِلُوا فَوَاحِدَةً»
Khat-ti ni: “Lamun niku kawatekh mak sang-ngup berlaku adil, maka cukup sai gawoh.” (QS. An-Nisa’: 3)
Bu Ustaz:
“Jadi syakhat paling utama delom poligami iyalah adil. Adil delom nafkah, gilekhan, pakaian, pok ting-ngal, perhatian khik hak-hak kebayan.”
Bu Narni:
“Tapi Bu Ustazd, api wat kudo jelema sai temon-temon adil?”
Bu Ustazd:
“Sai dimaksud adil dija iyalah adil delom pekakha sai mampu dijalanko jelema. Adapun ukhusan ge-khing atawa cinta di hati, sina sangun mak mukkin di gegoh ko.”
Bu Ustadz tekhus ngebacako ayat layin.
«وَلَنْ تَسْتَطِيعُوا أَنْ تَعْدِلُوا بَيْنَ النِّسَاءِ وَلَوْ حَرَصْتُمْ»
Khat-ti ni: “Niku sekali-kali mak akan sang-ngup berlaku adil antakha kaban kebayan-kebayan, walaupun niku sangun mekhat-tok temon ngeguway goh na.” (QS. An-Nisa’: 129)
Bu Ustazd:
“Ayat sa tentang khasa ge-khing atawa cinta di hati. Tapi hak-hak lahekh ni tetop wajib digegohko.”
Bu Karimah:
“Jadi lamun gohna, Bu Ustazd ngedukung atawa setuju poligami, ya?”
Bu Ustaz nyengih.
“Layin soal setuju atawa mak setuju. Sai wajib kham setujui iyalah syariat Allah. Api sai Allah halalko, mak dapok kham hakhamko. Gohna munih api sai Allah hakhamko, mak dapok kham halalko.”
“Poligami disyariatko ulah ngedok hikmah ni. Misal ni wat kaban kha-gah sai mekhattok ngedok anak, tapi kebayan ni mak dapok ngan-ndung. Wat munih kebayan sai makhing atau khadu menopause sehingga mak dapok lagi memenuhi kebutuhan mengiyan ni. Atawa jumlah bubay lebih nayah anjak kaban kha-gah.”
“Delom keadaan-keadaan semacom ina, poligami dapok jadi solusi guway ngejaga kehormatan, ngejawoh ko anjak zina guway ngelindungi kaban bubay.”
Beliau ngelanjutkon,
“Sedih ni, nayah ulun sai nolak poligami, tapi nagan ko perselingkuhan, bubay simpanan, kuppul bejama tapi mak nikah. Padahal Islam justru ngajak kaban jelema hukhik terhormat.”
Suasana ngedadak hening.
Tekhus Bu Narni nge-guda kebayan ustadz Munawwar.
“Lamun gohna, Bu Ustazd siap lamun suatu khani natti Ustazd Munawwar kawwin luwot ?”
Unyin mak-mak lalang.
Bu Ustazd nutuk lalang.
“Lamun nyak, In Syaa Allah siap menekhima syariat Allah. Tapi Ustazd Munawwar ni sai mak siap. Ia kelewat ge-khing jama nyak.”
Unyin mak-mak langsung lalang ngelah-hay bakhong.
Mak munni tuan rumah ngeluwahko tekwan han-ndop jama jus mang-nga. Arisan pun ditutup jama ngocok ge-khal peserta.
De-khani sina mak-mak mulang layin cuma ngusung bingkisan arisan, tapi munih ngusung pemahaman bahwa poligami delom Islam layin sekadar nutuki kehagaan ni kaban kha-gah, melayinko syariat sai diizin ko, tapi syakhat-syakhat ni biyak jama nayah hikmah ni. (*/305)
WaAllahu A’lam
_____
📚 H. Komiruddin Imron, Lc
✒️Shabahul_Khair
📚 Cekhita Lappung
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.