nataragung.id – Teginenong – Dibi sina suasana mahan Ustadz Munawar tenah-han tenang. Angin ngili lalun nge-geghak ko bulung-bulung mangga di juwagha mahan ni. Anjak dapogh tengisan bunyi uway menghung-ngak ghik hambaw kupi halom mulai tehambaw di-ngan nemui ko kaban jelema di mahan sina.
Mas Danu ghatong silaturahmi gegoh biasa ni. Ia sangun termasuk jama’ah sai aktif di pengajian mingguan di mesigid Al-Hidayah tiyuh Seghab-ba Mukkin. Seghadu ngobrol biasa-biasa gawoh, pudak ni tenah-han mulai serius.
“Ustadz,” cawa ni lalun, “setemon ni Sikam haga ngejuk tulung battu guway dakwah sa, tapi sikam bingung, api sai dapok sikam guway, Ikam hiji sekula cuma lulusan SMP gawoh?”
Ustadz Munawar jeghi-mut cutik suwa ngejuk ko kupi ghik putti gu-ghing di hadopan Danu.
“Sikam iri ngenah Mas Iwan Ustadz,” lanjut ni. “Beliau-an ngedok binaan, ngajagh kaban sanak ngaji di mesigid. Sedong ko Sikam dang ko ngajagh, baca kitab gawoh sappai gatta pagun blatat-blitut
Ustadz Munawwar ngeliak Danu penuh perhatian.
“Mas Danu, kigha-kigha api sai dapok niku guway,” lulih Ustadz Munawar lalun.
Danu ngekuy hulu ni.
“Ya… paling sikam cuma dapok nyupir, Ustadz.”
“Nah!” timbal ustadz suwa lalang bangik. “Sina kak termasuk potensi dakwah.”
Danu lalang liyom.
“Aih ustadz begu-ghaw. Masak nyupir di cawako huma guway dakwah?”
Ustadz ngedigok-digok ko hulu ni lalun-lalun.
“Mas Danu, dang sekali-kali ngang-ngap lunik amal sai dapok nulung guway agama Allah.”
Ustadz Munawar ngelaju ko balahan ni.
Gatta sa, dakwah kak berkembang, sappai utjuk-utjuk tiyuh. Undangan pengajian nayah. Ustadz sai siap ngisi ngedok. Kendaraan munih kadang ngedok.
“Tapi ge-ghing sai mak ngedok justeru supir ni sai siap ngattak ko,”
Danu mulai serius nyimak balahan ustadz.
“Nah,” lanjut ustadz, “lamun niku dapok mewakafko sebagian wattu mu guway ngattak ko ustadz berdakwah, sinalah tulung battu mu sai balak.”
“Dapok gawoh pahala mu, mehili setiap wat ulun sai massa hidayah anjak pengajian sai niku battu ngattak ko ustadz ni.”
Mata Danu mulai berbinar.
“Cuba bayangko,” lanjut Ustadz, “wat ustadz ngisi pengajian di tiyuh terpencil, ulah niku sai ngattak ko terus wat ulun sai tobat, wat sanak sai mulai ghajin sembayyang wat keluarga sai belajagh agama….”
“In Syaa Allah niku massa bagian pahala ni.”
Danu tehan-ning. Mungkin appai sa, ia nge-ghasa dighi ni wat peran delom dakwah.
“Secara teknis api cawi cagha ni, Ustadz?” Lulih Danu penuh semangat.
“Misal ni,” jawab Ustadz “delom seminggu niku nyediako wattu ghua ghani, anjak jam eppak dibi sappai jam sepuluh debingi.”
“Lamun wat ustadz sai peghallu di attak-ko, niku siap nulung ngattak ko.
“Sinalah tulung battu mu.”
Ustadz ngebaca ko hadits Rasulullah shalallahu alaihi wasallam:
“Man dalla ‘ala khairin falahu mitslu ajri fa’ilihi.”
Ghat-ti ni: “Barang sapa sai nun-jukko jama suatu kebetik’an, maka guway ni pahala gegoh pahala ulun sai ngeghaj-ja ko.” (HR. Muslim).
Lamun nunjuk ko ghanglaya gawoh massa pahala, lanjut ustadz, api lagi lamun terlibat langsung delom dakwah.”
“Sina termasuk ta’awun ‘alal birri wat taqwa, saling battu-ngebattu delom kebetik’an ghik ketakwaan.”
Pudak Mas Danu gatta tenah-han jawoh lebih cerah dibanding wattu pertama ghatong jeno.
“Siap, Ustadz!” cawa ni mantap. “Sikam ngedok pigha-pigha katca sai munih jadi supir. Natti Sikam koordinir
“Nah, gohna…” cawa Ustadz suwa jeghi-mut puas. “Dakwah ina butuh segala unyin potensi. Mak harus jadi ustadz pai guway ngedapokko pahala dakwah.”
Mata-ghani mulai condong guk barat. Cahaya jingga lalun-lalun nutupi langik dibi.
Mas Danu peghemisi mulang ghik langkah ni teghasa lebih happang.
Mukkin dibi sina ia appai menyadari satu hal penting:
Di ghanglaya dakwah setiap jelema wat tulung battu pesay-pesay. Mak harus jadi penceramah guway jadi pejuang di agama Allah. (*/265)
🖋️ Komiruddin, Lc.
📚 Cerita Pagi
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.
Catatan editor: Tulung Battu yang dimaksud dalam tulisan ini adalah: KONTRIBUSI.