nataragung.id – Teginenong – Dibi ina langik tenah-han mendung sekhadu Ashakh. Awan halom nge-gattung gegoh ni biyak temon di tiyuh Sekhab-ba Mukkin. Pengajian umum mingguan sai biasa di wat ko setiap Kamis dibi appai khadu selesai. Jamaah sai-sai mulang anjak mesigid .Tapi hujan khag-goh keddok temon, nge guway kaban jelema milih mennong di tekhabbah mesigid suwa nung-ngu hujan khi-khin.
Minggu ina gilekhan Ustadz Munawwar sai ngisi kajian. Beliau pagun mejong tenang, sesekali ngeliak hujan sai khag-goh di juwakha mesigid.
Tiba-tiba tengisan bunyi ulun ngucapko salam anjak kha-ngok mesigid.
“Assalamu’alaikum ustadz…”
“Wa’alaikumussalam warahmatullah… eh, Hanif,” timbal Ustadz Munawwar suwa te-jekhi-mut cutik. “Api kabakh mu? Pagun khajin ngaji kudo?”
“Alhamdulillah ustadz,” jawab Hanif suwa mejong di khaddik beliau. “Lamon makdok halangan sekanuwa usahako hadir,” cawa Hanif.
Ustadz Munawwar ngang-nguk lalun.
“Di dipa kaban khik mu sai sekhani na khajin nutuk pengajian? Akh Shaleh, Akh Shulhan, Akh Syamlan, khik Akh Salam. Kak munni temon nyak mak ngen-nah tiyan.”
Hanif nakhik hang-ngas tijang.
“Sina munih sai wat delom pikekhan sekanuwa ustadz. Gegoh ni gatta semangat belajakh ilmu agama mulai khag-goh, delom pengajian…., sai khatong mulai bekukhang, tenah-han sepi. Ngebaca buku munih kak jakhang. Bukti ni khani sa, sai khatong cutik. Ina munih nayah sai telat.”
“Tekhus menurut mu api penyebab ni,” lulih ustadz.
“Mukkin ulah nayah kesibukan, ustadz. Tapi gegoh ni layin cuma sina penyebab ni, gegoh ni ngedok kelesuan delom nuttut ilmu.”
Ustadz Munawwar tenah-han jekhi-mut lunik.
“Hanif, hati kaban jelema sangun ge-khing bekhubah-khubah. Kadang semangat, kadang lemoh. Ulah sina lah semangat nuttut ilmu harus tekhus di jaga.
Beliau ngebacako hadits Rasulullah shalallahu alaihi wasallam :
مَنْ سَلَكَ طَرِيقًا يَطْلُبُ فِيهِ عِلْمًا سَلَكَ اللَّهُ بِهِ طَرِيقًا مِنْ طُرُقِ الْجَنَّةِ
“Bakhang-sapa sai nyepok khanglaya guway nuttut ilmu, maka Allah gappangko guway ni khanglaya nuju surga.”
Ulah hadist ni agak tijang, beliau lanjut ko sappai selesai, tentang malaikat sai ngeppik ko sayap ni wattu nuttut ilmu, tentang unyin makhluk sai kilu appunan guway ulun sai berilmu jama tentang kiyai pewaris para nabi.
Suasana tekhabbah mesigid jadi hening penuh penghayatan.
“Tinuk Hanif,” cawa ustadz, “mati mulya ni ulun sai nyepok ilmu. Malah unyin malaikat ngekhag-gohko sayap ni ulah ridho jama tiyan sai nuttut ilmu. Unyin makhluk di bumi khik d langik ngilu ko appunan guway tiyan.
Hanif niyongko penjelasan ustadz serius temon.
Picawi cakha ni supaya semangat belajakh tetap hukhik ustadz?” lulih ni.
“Cakha ni wat tellu sai penting”
“Pertama, selalu ingok Keutamaan ilmu. Semakkin ulun memahami kemulyaan ilmu semakkin balak semangat ni guway belajakh.”
“Kedua, biasa ko ngebaca. Dang nunggu nayah wattu. Cutik tapi khutin lebih betik ketimbang nayah tapi jakhang ngebaca.”
Ustadz jekhi-mut terus cawa luwot.
“Bayangko, lamon se-khani ngebaca khuang-ngepuluh halaman, sebulan khadu enom khatus halaman, lamon setah-hun dapok massa khibuan halaman.”
Hanif ngangguk-ngangguk.
“Ketiga,” lanjut ustadz “begukhu.” Dang nge-khasa cukup belajakh pesayyan tanpa bimbingan anjak gukhu.
Api sai mak dipahami anjak buku, geluk lulih jama ustadz atau gukhu.”
“Gatta sarana komunikasi gappang. Wat telepon, se-kabakhan melalui pesan WA, atau khatong langsung guk majelis ilmu.
Hanif tehan-ning
Delom hati ni mulai tuwoh kesadaran bahwa nuttut ilmu layin sekadar khatong guk pengajian, tapi ngejaga semangat belajakh setijang hukhik.
Mak munni hujan mulai khi-khin.
“Mah-haf ustadz,” cawa Hanif suwa temegi, “Sekanuwa pekhamisi pai, lagi wat khasan bakhih jama kaban katja-katja pengajian.”
“Alhamdulillah,” timbal Ustadz suwa jekhi-mut. “Sampaiko salam sekanuwa guway tiyan.Tetop jaga semangat nuttut ilmu ya.”
“Insya Allah ustadz. Tekhima kasih atas nasihat ni.
“Wa iyyakum.”
Hanif ngelak-kah ninggal ko mesigid.
Hawa di luwah khasani segar, sekhadu hujan khag-goh. Tetesan way ni pagun nempel di bulung-bulung di juwakha mesigid.
Ustadz Munawwar lapah nuju motor sai kak tenah-han tuha, sai kak betahhun-tahhun ngejama’i ia berdakwah anjak tiyuh guk tiyuh.
Bingi sina lalun-lalun mulai khal-lom
Di tengah dunia sai semakkin sibuk ngalaw ukhusan dunia, tetop wat jelema-jelema sai ngejaga cahaya ilmu, ulah tiyan pandai bahwa ilmu adalah pelita sai dapok nekhangi khanglaya nuju ridha Allah Subhanahu wa Ta’ala. (*/270)
WaAllahu A’lam
_____
📚 H. Komiruddin Imron, Lc
✒️Shabahul_Khair
📚 Cekhita lappung
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.