nataragung.id – Teginenong – Bingi sina suasana di mesigid Al-Hidayah tekhasa tenang nihan. Sekhadu sembayyang Maghrib, pikha-pikha jama’ah pagun mejong santai di tepas mesigid.
Angin debingi behembus lalun. Sementara bunyi kaban sanak ngaji ketengisan lirih anjak mushola lunik di sapping mesigid.
Ustadz Munawar mejong besandar di tiang mesigid dijama’i pikha-pikha mekhanai: Umakh, Amir, khik Ammar.
Pebalahan tiyan bingi ina happang-happang gawoh tapi penuh makna.
“Ngeguway dusa sina pasti,” cawa Ustadz Munawar ngebukak balahan. Makdok jelema sai temon-temon bebas anjak dusa kecuali kaban Nabi khik Rasul.
Umakh sai anjak jeno cuma nengisko gawoh langsung ngelulih
“Ulah hapi dapok gohna Ustadz?”
Ustadz Munawar nyengih cutik, tekhus ngebacako Firman Allah:
وَنَفْسٍ وَمَا سَوَّاهَا
فَأَلْهَمَهَا فُجُورَهَا وَتَقْوَاهَا
Khat-ti ni: “Demi jiwa khik penyempurnaan ni, mula Allah meng-ilhamko jama jiwa sina khanglaya kefasikan khik ketakwaannya.” (QS. Asy-Syams: 7–8)
“Delom badan kaban jelema,” lanjut Ustadz, “wat takhik’an nuju kebetik’an khik wat munih dorongan nuju kejahatan, ulah sinalah kaban jelema dapok tergelincir delom dusa.”
Amir tenah-han mulai gelisah.
“Lamon gohna, picawi ustadz? Dusa kham kan sangun nayah temon?”
Ustadz Munawar nyekhiding tiyan sai-sai, penuh kasih sayang.
“Sinalah sebab ni kham ngebutuh ko appunan anjak Allah.”
Ustadz nyengih tekhus cawa luwot, “Haga…, dusa kuti di appuni lajin senayah buwih di lawok?”
Mata kaban mekhanai sina laju bebinar.
“Picawi cakha ni Ustadz?”
Ustadz Munawar ngebacako hadist Rasulullah shalallahu alaihi wasallam anjak Abu Hurairah Radhiyallahu tentang dzikir sekhadu sembayyang: “Barangsapa sai bertasbih haguk Allah tellung-ngepuluh tellu kali, khik bertakbir tellung-ngepuluh tellu kali, tiap khadu sembayyang, tekhus menyempurnako jama ngebaca:
لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ
Maka dusa-dusa ni diappuni lajin senayah buwih di lawok.” (HR. Muslim)
Suasana jadi han-ning. Cuma bunyi jangkrik bingi sina sai ketengisan lalun.
Tekhus Ustadz ngelanjut ko jama ngebaca hadist sai bakhih.
“Barangsapa ngucapko:
سُبْحَانَ اللّٰهِ وَبِحَمْدِهِ
Senayah sekhatus kali delom se-khani maka dusa-dusa ni haga di hapus lajin senayah buwih di lawok.” (HR. Bukhari khik Muslim)
Ammar sai anjak jeno cuma betiongan akhir ni ngelulih munih.
“Praktik ni picawi Ustadz,”
Ustadz Munawwar nyengih. “Sederhana nihan.”
“Pertama, luangko wattu kikha-kikha khua menit setiap khadu sembayyang wajib guway berdzikir: Subhanallah 33 kali, Alhamdulillah 33 kali, Allahu Akbar 33 kali, tekhus ditutup jama bacaan tauhid jeno.”
“Kedua, luangko munih waktu kikha-kikha khua menit delom se-khani guway ngebaca:
«سُبْحَانَ اللّٰهِ وَبِحَمْدِهِ»
“Senayah sekhatus kali.”
Beliau tekhus nyekhiding tiyan penuh hakhopan.
“Amalan sina happang di bub-bekh tapi balak di sisi Allah. Masalah ni layin sulit atawa gappang, tapi haga atawa mawat.”
Angin debingi te-khasa behembus luwot, langik tenah-han gelap betabur bintang.
Umakh nunduk lalun.
“Kadang kham sibuk nyepok amalan balak padahal kha-ngok appunan Allah, khadik temon.”
Ustadz Munawwar ngangguk lalun. “Allah sina Maha Pengappun. Ia bukak ko kha-ngok appunan tiap wattu. Bahkan jama dzikir sai happang, dusa-dusa kham sai happang-happang dapok di hapus.”
Beliau tekhus cawa jama bunyi sai lirih. “Sai paling menyedihko, layin nayah ni dusa kaban jelema, tapi wattu kaban jelema mak haga mohon appunan haguk Rabb ni.”
Bingi tambah khallom. Di tepas mesigid Al-Hidayah ina tenah-han ni hati kaban mekhanai mulai tersentuh. Mudah-mudahan anjak bingi sina, wat bubbekh-bubbekh sai mulai basoh jama dzikir, behakhop natti ni wattu mulang ngehadop Allah delom keadaan dawak, lajin dusa-dusa ni senayah buwih di lawok. (*/275)
WaAllahu A’lam
_____
📚 H. Komiruddin Imron, Lc
✒️Shabahul_Khair
📚 Cekhita Lappung
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar..