natagung.id – Teginenong – Pagi mehayu matakhani appai cakak sepenggalan. Himbun pagun tegattung di ujung bulung putti belakang mahan jelema tiyuh. Khanglaya tiyuh makkung tenah-han khamik. Cuma sekali-kali ketengisan bunyi motor teliyu khik tegur sapa warga sai kak mulai ngebuka begawi ni.
Di sudut khanglaya tiyuh Sekhab-ba Mukkin, wat wakhung sembako lunik, tenah-han ni appai dibukak. Khak kayu ni, tenah-han gegoh lagi baru. Bukkus-bukkus kupi, mi instan, minyak gukhing, khik gula tesusun khapi ngegattung di depan wakhung.
“Assalamu’alaikum… Sing-ngah ustadz!” sapa Pak Sardi khik pudak cerah, wattu ngenah Ustadz Munawwar lapah kukut liyu di depan wakhung ni.
“Wa’alaikumussalam… eh Pak Sardi. Khupa ni, niku tinggal di dija ya?” timbal Ustadz Munawwar suwa nyengih nge-khad-dik.
“Ya ustadz. Anjak dipa, ulah hapi lapah kukut?” Lulih Pak Sardi suwa ngayinko ko mejong.
“Lagi olahraga ringan. Mumpung pekhei. Nyepok hiting,” jawab Ustadz Munawwar santai.
Pak Sardi ngeguwai ko kupi halom panas khik ngepikko sepanjan-nyang putti gukhing di lam-bung mija lunik. Pudak ni tenah-han bungah, tapi tenah-han munih tegi wat khasa kuwatekh.
“Ustadz…, kilu du’a ni sekanuwa appai bukak wakhung sembako. Appai seming-ngu sa. Mudah-mudahan lakhis khik nayah sai belan-nya,” cawa ni penuh hakhopan.
Ustadz Munawwar nyengih cutik.
“Lamon haga lakhis. Kudu makai Penglakhis….”
Pak Sardi laju tekan-nyat
“Lho…. Penglakhis picawi Ustadz? Sepan-nai sekanuwa penglakhis anjak dukun ina haram khik syirik.”
Ustadz Munawar lalang lalun.
“Layin penglakhis anjak dukun ina Pak Sardi. Tapi penglakhis sai di ajakh ko Islam.”
Pak Sardi tambah penasaran.
“Gohiji Pak Sardi,” cawa Ustadz Munawar, “cuba kekhaj-ja ko pitu S jama pelanggan.”
“Pitu S?” lulih Pak Sardi suwa nger-nyitko dahi ulah bingung.
“Iyu.”
Pertama: Senyum.
Layani pelanggan khik pudak cerah. Senyum ina sedekah. Ulun lebih nyaman belanja di wakhung sai khamah di banding ko jama sekedaw wakhung sai jekhi-mut.
Kedua: Tegokh.
Tegokh pelanggan sai betik. Akhuh sesuai ukhawan sai di ge-khingi ni. Kadang ulun ge-khing layin ulah bakhang ni mukhah. Tapi ulah mekhasa di khag-ga’i.
Ketiga: Salam.
Biasako ngucap ko salam atawa Pebalahan sai betik. Misalni: ‘Sila ko Pak’, ‘Selamat datang’, ‘Semuga puskam munyaian’. Balahan sederhana, tapi ngehandop ko hati.
Keempat khik Kelima: Sopan khik Santun.
Gunako bahasa sai lembut. Dang ngebentak pelanggan walaupun kham lagi palai. Pelayanan sai betik, ina modal balak delom bedagang.
Keenam: Shiddiq atawa jujur.
Sa inti anjak segalani. Dang ngukhangi biyak timbangan, dang nipu kualitas bakhang. Sekali pelanggan merakhasa ditipu, lebon kepercayaan ni.
Ketujuh: Syukran atawa ngucapko tekhima kasih.
Dang nganggap remeh ucapan tekhima kasih. Ulun ge-khing, lamon di khag-ga’i. Kadang pelanggan khatong luwot layin ulah butuh bakhang, tapi ulah nyaman.”
Pak Sardi ngangguk-ngangguk.
“Masya Allah…. Sekanuwa appai faham Ustadz. Jadi sa, penglakhis sai benokh ya?”
“Iya,” jawab Ustadz Munawwar suwa ngehirup kupi.
“Ulah rejeki ina layin cuma soal dagangan. Tapi munih soal akhlak. Rasulullah shalallahu alaihi wasallam bersabda:
التَّاجِرُ الصَّدُوقُ الْأَمِينُ مَعَ النَّبِيِّينَ وَالصِّدِّيقِينَ وَالشُّهَدَاءِ
‘Pedagang sai jujur khik amanah, natti ni haga jama para nabi, Ulun-ulun sai shiddiq khik para syuhada.’ (HR. Tirmidzi).
“Tinuk Pak Sardi, mati mulia ni pedagang sai jujur.”
Pak Sardi nyengih bangik. Hatini jadi lapang. Ternyata keberkahan usaha layin cuma soal modal balak atawa strategi dagang, tapi munih soal akhlak khik pelayanan.
“Oalaaah… jadi gohna ya ustadz. Tekhima kasih atas ilmu ni. Oh iya, kupi ni diminum luwot ustadz…, putti gukhing ni dicabaiko pai.”
Pagi tambah tekhang. Pikha-pikha pembeli mulai khatong guk wakhung sai lunik ina. Ustadz Munawwar pekhimisi ngelanjutko lapah kukut ni.
Sementara Pak Sardi temegi di depan wakhung khik semangat bakhu.
Gatta ia faham….
Bahwa sengihan sai tulus, kejujuran, khik pelayanan sai betik… kadang lebih ampuh dibandingko sekhibu jimat penglakhis.
Sebab penglakhis sai sebenokh ni layin jimat, tapi akhlak mulia khik keberkahan anjak Allah Subhanahu wa Ta’ala.
Tabiik….. (*/280)
WaAllahu A’lam
_____
📚 H. Komiruddin Imron, Lc
✒️Shabahul_Khair
📚 Cekhita Lappung
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.