nataragung.id – Teginenong – Bingi sina angin liyu lalun di teghab-bah mesigid.
Lappu-lappu sai hughik kughang teghang di mesigid Al-Hidayah nyorot pudak jama’ah sai mejong ngelingkar penuh khidmat.
Pengajian rutin debingi Jum’at hampir beghadu. Di hadopan jamaah, Ustadz Munawwar nutup kajian ni nge-gunako bunyi sai lembut.
“Kesimpulan pengajian bingi sa,” cawa ni lalun, “salah satu tanda iman ialah muliako temui sai ghatong guk mahan kuti ghuppok, gegoh hadits Rasulullah shalallahu alaihi wasallam sai ghadu gham bahas jama-jama jenno.
Lamon pagun wat sai makkung jelas, payo gham diskusiko luwot,”
Suasana jadi hening seghab-bok. Tiba-tiba Pak Salim ngak-kat pungu ni.
“Ngelulih ustadz… seandai ni, api cawi lamon temui sai ghatong sina mak di ughaw jama mak di haghobko keghatogan ni, api kah tetop wajib gham hormati?
Sebagian jamaah tegi lalang cutik nengis pertanyaan Pak Salim. Ustadz Munawwar ngejawab lalun,
“Maksud Pak Salim… tukang maling atau tukang tagih hutang?”
“Layin ustadz,” jawab Pak Salim suwa ngehela hang-ngas tijang. “Ikam iji mantri, kebayan ikam bidan. Sikam ngebuka praktek di mahan.
Hampir tiap ghani wat jelema sai ngaku ni anjak LSM ghatong. Ujung-ujungni kilu duit. Kadang ikam kessol. Lamon dilayani, ia ghatong terus. Lamon ditagan ko, ia nyepok-nyepok kesalahan.
Nah, api cawi sikap sai betik sai harus ikam lakuko guway ngehadapi jelema-jelema sina?”
Pertanyaan sina nge-guway jamaah jadi serius. Sebab mungkin nayah sai ghadu ngalami kejadian sai gegoh: ngehadopi jelema sai ghatong nge-guway keresahan, layin ketenangan.
Nengis pertanyaan sina Ustadz Munawwar cuma senyum. Senyum seorang da’i sai ngeliak hughik nge-gunako kacamata iman.
“Pak Salim,” timbal ni lalun, “gham iji juru dakwah, apipun profesi ni. Cuba bepikegh positif. Jadiko tiyan sina layin musuh, tapi objek dakwah. Disan lah seni Nge-ghubah tantangan jadi peluang.”
Pak Salim ngernyitko dahi ni. Jamaah sai baghih makin nyimak penjelasan ustadz lebih serius.
“Sambuk tiyan nge-gunako senyum,” lanjut ustadz. “Persilah ko tiyan mejong. Jamu jama minuman. Layani betik-betik. Tatap pudak tiyan nge-gunako kasih sayang. Pas tiyan mulang, selipko amplop suwa cawa dang kapok ghatong luwot.”
Suasana mesigid langsung ghamik jama lalang wayah anjak kaban jamaah.
“Wah ustadz… lamon goh na, dapok tiap ghani tiyan ghatong. Bangkrut perusahaan ikam!” cawa Pak Salim setengah tekan-jat.
Ustadz senyum luwot.
“Sinalah, mulani gham harus mandang tiyan sebagai huma guway dakwah. Selama iji mungkin tiyan cughiga, ulah kuti memusuhi tiyan. Tapi gatta cuba nge-gunako akhlak sai betik, paling mawat tiyan beghadu memusuhi kuti. Bahkan dapok gawoh hati tiyan jadi luluh.”
Ustadz beghadu seghab-bok bebalah, terus dilanjutko ni nge-gunako bunyi lebih ghallom.
“Kadang gham sibuk nyep-pok jelema guway diajak delom nge-guway kebetik’an. Gatta…, Allah kighim tiyan ghatong pesai guk mahan gham. Api sina layin peluang guway kebetik’an?”
Kalimat sina nyentuh hati jamaah.
Mati ge-ghing ni, kaban jelema ngeliak masalah cuma sebagai gangguan, padahal dapok jadi delom ni Allah nyippon gha-ngok pahala sai balak.
Mak unyin jelema sai ghatong ngusung keresahan harus dibalos nge-gunako kebetjian. Sebab hati jelema mak dapok di takluk ko nge-gunako amarah, tapi harus munih nge-gunako kelembutan.
Ustadz Munawwar nerusko pebalahan, “Sesekali ughai tiyan mengan baghong. Ghatong ko munih ustadz. Ajak tiyan ngobrol soal agama sai happang-happang gawoh. Pas tiyan mulang, juk cutik hadiah. Lamon dikelola betik layin mustahil tiyan justru natti ni jadi pendukung dakwah gham.”
“Balak dong Pak Ustadz biaya ni?” timbal Pak Nashlan anjak belakang.
“Mawat….” geluk di timbal ustadz mantap. “Anggap gawoh ina tabungan gham di akhirat natti. Yakinlah Allah bakal nge-gatti ni nge-gunako sai lebih betik. Target gham layin sekadar ngejuk duit, tapi ngakuk hati tiyan.”
Laju Ustadz ngebaca pepatah Arab:
كَمَا تَدِينُ تُدَانُ
“Api sai kuti lakuko guway jelema baghih, begitu ghadu balasan ni jama badan dighi kuti pesai.”
Suasana muloh hening. Pebalahan sederhana, tapi ghallom makna ni. Sebab hughik sangun ge-ghing nge-balik ko api sai gham tabuy
Lamon gham nabuy ko kebetjian, maka kebetjian munih sai ghatong. Tapi lamon gham nabuy kelembutan, hati sai keghas perlahan jadi lemoh.
Pak Salim senyum lega.
“Jazakallahu khairan ustadz. Penjelasan ustadz nge-guway hati ikam lebih lapang.”
Jam sai tegattung di- dinding mesigid nunjukko pukul 19.25. Wattu Isya kak ghatong. Pak Herman lapah nuju mikrofon. Mak munni bunyi adzan menggema mecohko ngison ni bingi sina, ngajak kaban jelema balik haguk Allah.
Gehina-lah kehughi’an kaban jelema…
Mak unyin sai ghatong delom hughik harus di lawan. Sebagian cukup dihadopi nge-gunako kesabaghan. Sebagian luwot ditakluk ko nge-gunako kasih sayang.
Jelema balak layin lah tiyan sai mampu ngebalos kejahatan jama nge-gunako kejahatan.Tapi tiyan sang-ngup nge-ghubah gangguan jadi peluang, nge-ghubah musuh jadi sahabat, jama nge-ghubah keresahan jadi ghanglaya nuju ridho Allah.
Nayah lah uttung jelema sai mampu nge-gunako setiap detik hughik ni guway lapahan di ghanglaya sai diridhai Allah. Sebab pada akhir ni, layin tentang sepigha nayah jelema sai ghatong guk gham, tapi tentang sepigha nayah hati sai berhasil gham sentuh ulah Allah SWT <>
#KIS
#ceghita_lappung