nataragung.id – Teginenong – Langik tenah-han ghadu mulai jingga. Angin dibi ngili-ngili di teghabbah mesigid Al-Hidayah. Tellu jama’ah mejong ngelilingi ustadz Munawar suwa ngobrol santai nung-ngu ebbang maghrib.
Ahmad ngebukak pebalahan. “Ustadz, gegoh ni tahhun sa, lebaghan Idul Adha mak bida-bida luwot wattu ni.”
Ustadz Munawar jeghi-mut cutik. “Iyu, Alhamdulillah. Sina hallaw, supaya kaban jelema Islam mak bingung ngelaksana-ko puasa Arafah. Sebab tanggal siwa (9) Dzulhijjah sina wattu ni Arafah, wattu sai mulya di sisi Allah SWT.”
Hamid nim-bal munih. “Jenno wattu ustadz nyebut puasa Arafah, api keutamaan ni, ustadz?”
Ustadz Munawar ngang-nguk, “Keutamaan ni balak temon. Rasulullah shalallahu alaihi wasallam bersabda:
صِيَامُ يَوْمِ عَرَفَةَ أَحْتَسِبُ عَلَى اللَّهِ أَنْ يُكَفِّرَ السَّنَةَ الَّتِي قَبْلَهُ وَالسَّنَةَ الَّتِي بَعْدَهُ
Ghat-ti ni: “Puasa di ghani Arafah Sikam (Rasul) beha-ghop haguk Allah tagan di hapusko dusa setahun semakkung ni jama dusa setahun seghadu ni.” (HR. Muslim).
“Ghat-ti ni, puasa Arafah jadi sebab gugur ni dusa-dusa lunik selama ghua (2) tahhun. Subhanallah, beghak nihan kasih sayang Allah.” lanjut ustadz Munawar.
Nengis penjelasan Ustadz Munawar, Mahmud tenah-han kagum. “Api unyin dusa di ampuni Ustadz,” lulih Mahmud.
Ustadz Munawar, “Mak unyin. Tapi sai di hapus ina dusa-dusa sai lunik. Dusa-dusa sai balak wajib di taubati secagha serius atawa sungguh-sungguh,” cawa Ustadz Munawar.
Beliau neghusko pebalahan ni.
“Taubat sina syarat ni: ninggalko kelakuan sai bedusa, nyessol ghik niatko mak ngulangi kelakuan sina luwot. Lamon ngedok kaitan ni jama hak ulun baghih, wajib kilu mahhaf atau ulang ko hak jelema sina sai kak gham akuk.”
Suwa Beliau ngebacako firman Allah sai bunyi ni:
وَتُوبُوا إِلَى اللَّهِ جَمِيعًا أَيُّهَا الْمُؤْمِنُونَ لَعَلَّكُمْ تُفْلِحُونَ
Ghat-ti ni: “Bertaubat Kuti unyin ni haguk Allah wahai jelema-jelema sai beriman, tagan Kuti ngedok uttung.” (QS. An-Nur: 31)
Mahmud ngehela hang-ngas. “Maa Syaa Allah, balak nihan rahmat Allah. Dusa sai kak gham guway atawa gham lakuko, kak ghadu di janjiko ampunan ni.”
Ustadz Munawar jeghi-mut suwa mandang langik dibi. “Sinalah beghak ni rahmat Allah. Jadi dang sia-sia ko wattu Arafah, nayah ko puasa, dzikir, du’a, istighfar ghik amalan saleh layin ni.”
Teghus ustadz nambah ko hadist baghih sai bunyi ni:
مَا مِنْ يَوْمٍ أَكْثَرَ مِنْ أَنْ يُعْتِقَ اللَّهُ فِيهِ عَبْدًا مِنَ النَّارِ مِنْ يَوْمِ عَرَفَةَ
Ghat-ti ni: Makdok ghani di-dipa Allah lebih nayah ngebebasko hamba ni anjak apuy neghaka dibanding di ghani Arafah.” (HR. Muslim).
Suasana jadi hening. Jama’ah sai mejjong di teghabbah mesigid tenah-han termenung. Cahaya mataghani dibi kak redup. Tiba-tiba bunyi ebbbang maghrib tengisan.
“Allahu Akbar… Allahu Akbar…”
Kaban jama’ah min-jak lalun-lalun. Wat sai nyiap ko way guway bukak puasa, wat sai ngehallaw ko sin-jang ni. Teghus tiyan lapah guk shaf-shaf mesigid guway sembayyang maghrib berjamaah.
Dibi sina diteghabbah mesigid sai sederhana, tiyan muloh di-ingok ko, bahwa rahmat Allah jawoh lebih beghak anjak dusa kaban jelema se-unyin ni. (*/255).
WaAllahu A’lam
_____
📚 H. Komiruddin Imron, Lc
✒️Shabahul_Khair
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.
✒️ Komiruddin lc
📚 Cekhita Lappung