nataragung.id – Teginenong – Suasana mesigid Al-Hidayah mehayu sina khasa ni han-ndop jama penuh khusyuk. Cahaya matakhani sai appai cakak kukhuk lalun-lalun anjak jen-nila mesigid, nekhangi pudak kaban jama’ah Subuh sai mejjong rapi nengisko taushiyah anjak Ustadz Munawwar.
Jama bunyi sai lembut Ustadz Munawwar bebalah,
“….Ketel-lu, syakhat supaya jelema mak jadi ulun sai nge-khugi hakhus saling menasihati delom kebenokhan khik kesabakhan. Mula pastiko nasihat sai kham sappai ko temon menurut agama, layin sekadar pekhasaan atau sangka-sangka gawoh.
Laju, ulah kebenokhan sina kadang biyak di tekhima, mulani nyappai ko nasihat hakhus di sappai ko jama cakha sai penuh kesabakhan.”
Pikha-pikha jama’ah ngangguk lalun, ngejuk tanda bahwa tiyan faham jama penjelasan ina.
Mak munni kemudian moderator ngebuka sesi tanya-jawab.
“Payu lamun wat sai haga ngelulih.”
Pak Anwari sai anjak jenno tenah-han serius langsung ngakkat pungu.
“Ustadz…., lamun kham khadu nasihati ulun, tapi ulun sina mak nekhima, tapi malah ngejawoh, api sikap sai hakhus kham akuk?”
Ustadz Munawwar nyengih lembut.
“Pak Anwari… sai pertama hakhus kham pahami, tugas kham cuma nyappai ko gawoh, layin ngejuk hidayah. Ngejuk hidayah ina hak ni Allah.”
Beliau tekhus ngebacako firman Allah:
إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَنْ يَشَاءُ
Khat-ti ni: “Sesungguh ni Kuti mak dapok ngejuk petunjuk jama jelema sai kuti cintai, tapi Allah ngejuk petunjuk jama sapa sai Ia kehendaki.” (QS. Al-Qashash: 56)
Beliau nekhusko,
“Bahkan Rasulullah shallallahu ‘alaihi wa sallam gawoh mak kuasa ngejuk hidayah jama kemaman beliau Abu Thalib. Api lagi kham.”
Pak Anwari ngangguk lalun.
“Kedua,” lanjut Ustadz Munawwar, “lamun nasihati ulun hakhus dilandasi rakha sayang, layin khasa bet-ji.”
“Kadang wat ulun nasihati layin mekhat-tok ngajak betik, tapi ulah mekhat-tok niyakko, ngeliyom ko, atau nge-khasa dikhi ni paling benokh. Sa sai ngeguway nasihat mak lagi barokah.”
Beliau bekhadu sekhab-bok, tekhus ngelanjutkon,
“Mulani ikhlas hakhus jadi pondasi utama delom dakwah.”
Suasana mesigid tambah hening. Jamaah nyimak penuh perhatian.
“Ketiga,” cawa beliau, “usaha menasihati tetop hakhus dilakukon walaupun menurut pikekhan kham ulun sina sulit bekhubah.”
Beliau ngebacako ayat luwot:
وَإِذْ قَالَتْ أُمَّةٌ مِنْهُمْ لِمَ تَعِظُونَ قَوْمًا اللَّهُ مُهْلِكُهُمْ
“Dan wattu segolongan ulun cawa, ‘Ulah api niku tetop menasihati kaum sai Allah haga binasako?’…” (QS. Al-A’raf: 164)
Beliau ngejelasko,
“Tiyan tetop berdakwah ulah wat khua tujuan.”
“Pertama, supaya jadi alasan di hadopan Allah bahwa tiyan khadu ngejalankanko kewajiban.”
“Kedua, sapa pan-nai suatu khani natti hati ulun sina dibukak ko Allah tekhus massa hidayah.”
Pak Anwari tambah sekhius nyimak.
“Keeppak,” cawa Ustadz Munawwar, “ikhingi ko nasihat jama du’a.”
“Sebab hati jelema ngedok di pungu Allah. Khani sa kekhas, jemoh dapok lembut. Khani sa nolak, jemoh dapok miwang ulah tersentuh hidayah.”
Beliau cawa lalun,
“Dang palai ngedu’a ko ulun sai kham sayangi.”
Moderator ninuk guk arah Pak Anwari,
“Api khadu jelas, Pak?”
“Alhamdulillah… jelas nihan,” tim-mbal Pak Anwari.
Moderator nga-yin ko Ustadz Munawwar ngejuk balahan penutup.
Beliau ninuk jamaah sai-sai tekhus cawa,
“Delom Surat Al-‘Ashr Allah nekhangko bahwa unyin jelema wat delom kekhugian, kecuali sai ngedok eppak pekakha: iman, amal saleh, saling menasihati delom kebenokhan, khik saling menasihati delom kasabakhan.”
“Mula lamun kham nasihati ulun bakhih dang cuma mikekh picawi ulun ina bekhubah, tapi pikekh ko munih picawi dikhi kham selamat dihadopan Allah.”
Nasihat sai luwah anjak hati sai ikhlas In Syaa Allah lebih gappang kukhuk guk hati.”
Moderator pun nutup pengajian pagi mehayu ina.
“Demikian taushiyah Subuh pagi mehayu sa. Semoga Allah ngejadiko kham termasuk ulun sai saling menasihati delom kebenokhan khik kesabakhan.”
“Payu kham tutup pengajian sa jama-jama ngebaca hamdalah.”
Bunyi “Alhamdulillahi Rabbil ‘Alamin” pun bergema lalun memenuhi ruangan mesigid.
Di luwah, matakhani pagi tambah khang-ngal. Kaban memanuk bela teham-mbokh di langik bikhu, sementara jamaah mulang sai-sai suwa ngusung nasihat guway ngelapahi hukhik sai penuh ujian jama kesabakhan. (*/295)
WaAllahu A’lam
_____
📚 H. Komiruddin Imron, Lc
✒️Shabahul_Khair
📚 Cekhita Lappung
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.