nataragung.id – Teginenong – Debingi sina angin semilir teliyu di juwagha mesigid Al-Hidayah tiyuh Seghab-ba Mukkin. Lappu mesigid nyinaghi cahaya kuning han-ndop dibingi Jumat sai ngison. Jama’ah sai-sai mulang anjak pengajian ghutin ulah kak bubagh.
Diteghab-bah mesigid, Ustadz Munawar lagi mejong suwa bebalah jama Pak Sanusi, Ketua Ta’mir mesigid sai dikenal sederhana jama amanah.
“Pak Sanusi, pigha umogh mesigid sa?” lulih ustadz Munawar suwa ninuk dinding mesigid sai kak mulai kusam dikanik wattu.
“Kughang lebih ghuang-ngepuluh (20) tahun ustadz,” timbal Pak Sanusi lalun. “Gegoh ni ustadz tegi wat sai dipikighko?”
Ustadz Munawwar jeghi-mut cutik.
Mesigid sa ghadu nayah jasa ni, ghadu nayah sai sujud, bedu’a, miwang ulah nguk-kap ko tobat, jama nayah munih sai ngebaca Alqur’an anjak delom mesigid sa. Tapi ku tinuk dija-dudi ghadu nayah sai peghal-lu di sani ko. Api kak wat rencana haga di hallaw ko?
Pak Sanusi naghik hang-ngas tijang. Pudak ni tenah-han ngejamuk ko kegelisahan.
“Rencana sih kak wat ustadz. Malah ghadu pigha kali di musyawarah ko. Tapi kendala ni masalah biaya.”
“Pigha kigha-kigha biaya ni,” lulih ustadz luwot.
“Kigha-kigha seghatus juta,”
Ustadz Munawar ngang-nguk lalun.
“Lamon jelema di tiyuh sa wat pigha KK.”
“Kughang lebih wat sekitar ghua-ghatus KK.”
“Nah, ghat-ti ni pagun sangat mungkin,” cawa ustadz Munawar mantap.
“Lamon tiap KK nyum-bang lima ghatus ghibu selama se tahun, beres renovasi sina.”
Pak Sanusi jeghi-mut hambar.
“Biyak ustadz…., dang ko lima ghatus ghibu, limang-ngelupuh ghibu gawoh, kadang pagun biyak. Warga dija nayah petani jama buruh.”
Ustadz Munawar ngeliyak guk Pak Sanusi, di pedu ko ni penuh keyakinan.
“Pak Sanusi…, gatta sa kadang ge-ghing ngedok atawa wat masalah jama ulun baghih layin ulah mak mampu, tapi ulah kung ngehalu cagha, jama kung ngedok kehagaan. Padahal wat pepatah: Dipa ngedok haga, disan wat ghanglaya.”
Ustadz Munawar neghus ko balahan ni dengan tenang.
“Cuba bayangko, lamon rencana sina di guway setahun. Tiap mahan di bagiko semacam jimpitan atawa celengan. Mak peghallu langsung balak. Cukup se-ghibu lima ghatus (1500) tiap ghani. Nilai ni lunik bahkan kadang lebih lunik anjak ghag-ga kupi atawa ghukuk sai di habis ko tampa teghasa.”
Pak Sanusi mulai serius nengis ko cawaan Ustadz Munawar.
“Lamon seghani se-ghibu lima ghatus, sebulan jadi eppak ngepuluh lima ghibu, setahun lebih anjak lima ghatus ghibu, kali ko gawoh jama ghua ghatus KK, target sina In Syaa Allah tercapai,” cawa Ustadz Munawar.
Mata Pak Sanusi mulai berbinar.
“Tapi sai paling penting,” lanjut ustadz, “pengughus harus amanah. Dang sappai duwit ummat di salah gunako. Ulah kepercayaan masyarakat sina modal paling balak delom berdakwah.”
Suasana bingi sina makin han-dop. Anjak kejawohan ke-tengisan bunyi jangkrik sahut-sahutan.
“Teghus jelasko jama masyarakat,” sambung ustadz, “bahwa tiap batu-bata sai di pasang dapok jadi amal jariyah. Selama mesigid di pakai sembayyang, ngaji jama dakwah. Selama sinalah pahala ni terus mehili.”
Pak Sanusi ngang-nguk lalun. Pudak ni sai jeno pesimis mulai beghubah jadi penuh haghopan.
“Iyu munih ustadz… ternyata loman di pikegh-pikegh selama iji mungkin ulun terlalu fokus jama balak ni biaya, layin cagha ngedapokko biaya sina.”
Ustadz Munawwar jeghi-mut.
“Nayah perkara sai balak, jadi happang lamon di keghaj-ja ko jama-jama. Tapi dang lupa ingok munih, nayah cita-cita gagal layin ulah mak mampu, tapi ulah kak nyeghah semakkung berjuang.”
Debingi tambah ghallom. Jam dinding di mesigid kak nunjukko wattu sembayyang Isya. Pak Herman, muadzin mesigid, mulai lapah nuju mikrofon.
Pak Sanusi temegi suwa salaman jama ustadz Munawar.
“Teghimakasih ustadz. Bingi sa teliyak ni kaban ulun jadi semangat luwot. Insya Allah, delom wattu ghadik sa, sikam haga kuppul ko pengurus sekaligus nyusun langkah sai haga di akuk.”
“Alhamdulillah,” timbal ustadz. “Ulah sesungguh ni Allah pasti ngebukak ko ghanglaya jama jelema sai sungguh-sungguh di ghanglaya kebetik’an.”
Langik bingi sina tenah-han cerah nayah bintang.
Dihati Pak Sanusi penuh haghopan baru, mulai semangat luwot seteghang cahaya mesigid sai mak lekot palai nyinaghi tiyuh sai damai sa. (*/260)
WaAllahu A’lam
_____
📚 H. Komiruddin Imron, Lc
✒️Shabahul_Khair
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.
#KIS
#Cekhita_Lappung