nataragung.id – Teginenong – “Assalamu’alaikum, Pak Ahmad…” Ustadz Munawwar nyapa Pak Ahmad, sai pagi mehayu ina lagi sibuk nyusun dagangan putti di wakhung lunik di pinggekh khanglaya. Him-mbun pagi pagun nempel di bulung-bulung. Cahaya matakhani lalun-lalun ngelebonko kabut tipis di lam-mbung kaban batang kayu.
Pagi mehayu sina Ustadz Munawwar lagi jogging atawa olahraga ngelilingi tiyuh. Kebenokhan beliau ngeliak Pak Ahmad, jamaah mesigid Al-Hidayah sai khajin nutuk kajian Subuh.
“Wa’alaikumussalam…. eh Ustadz Munawwar…” Jawab Pak Ahmad suwa nyengih, suwa ngayinko ustadz mejong di kekhassi huwwi depan wakhung.
“Api kabakh dagangan mu, Pak Ahmad? Lakhis kudo?” lulih ustadz suwa ngelap hiting di kedak ni.
“Alhamdulillah ustadz, cukuplah guway kebutuhan sekhani-khani.”
Ustadz ngeliak tuppukan putti di wakhung.
“Putti ni hasil kebun pesay, api ngebeli anjak ulun bakhih?”
Pak Ahmad nyengih suwa ngedigok.
“Gatta ngebeli ustadz. Se-khani na ikam anjak nanom pesay. Tapi akhir ni kapok.”
“Lho, ulah hapi sebab ni?”
“Soal ni, tiap happekh panen, pasti wat sai ngemena’i, lamon layin kekha, ya sekelik ni kekha…” jawab Pak Ahmad begukhai.
Tiyan khua lalang pejama.
Pak Ahmad cawa lalun,
“Tapi tekhus tekhang ustadz, hati ikam se-khani na, kesol nihan, ikam sai palai-palai nanom, nyikham, ngedawakko jukuk di kebun, eh…, pas haga dituwakh malah habis menna. Khasani sia-sia gawoh.”
Ustadz Munawwar nyengih.
“Pak Ahmad, sebenokh ni usaha bapak mak lekot sia-sia di sisi Allah.”
Beliau tekhus ngebaca ko hadits Rasulullah shalallahu alaihi wasallam:
«مَنْ اَمْسَى كَالًّا مِنْ عَمَلِ يَدَيْهِ اَمْسَى مَغْفُوْرًا لَهُ»
Khat-ti ni: “Bakhang sapa diwattu dibi nge-khasa palai ulah kekhaj-jaan khua pungu ni nyepok nafkah, maka dibi ina dusa-dusa ni diappuni,” (HR. Thabrani)
Ustadz nekhusko,
“Jadi khasa palai bapak wattu nanom, nyikham, ngekhawat kebun, In Syaa Allah jadi ibadah di sisi Allah.”
Pak Ahmad tam-mbah sekhius nyimak.
Ustadz cawa luwot,
“Tekhus sai kekhua,” lanjut ustadz, “api sai di kanik makhluk layin anjak tanoman kham jadi sedekah.”
Beliau ngebacako hadits Rasulullah shalallahu alaihi wasallam:
«مَا مِنْ مُسْلِمٍ يَغْرِسُ غَرْسًا إِلاَّ كَانَ مَا أُكِلَ مِنْهُ لَهُ صَدَقَةً وَمَا سُرِقَ مِنْهُ لَهُ صَدَقَةً وَمَا أَكَلَتِ الطَّيْرُ فَهُوَ لَهُ صَدَقَةً»
Khat-ti ni: ” Layin lah ulun muslim nanom tanoman, tekhus dikanik anjak ni, kecuali menjadi sedekah bagi ni. Api sai di maling anjak ni menjadi sedekah bagi ni, khik api sai di kanik memanuk juga jadi sedekah bagi ni.” (HR. Muslim)
Pak Ahmad nakhik hang-ngas tijang.
“Berarti…, selama iji ikam sebenokh ni tetop uttung ya ustadz?”
Ustadz nyengih.
“Bahkan dapok gawoh lebbih uttung.” Jawab ustadz.
“Sebab sai dikanik jelema atau binatang bekhubah jadi pahala sai tekhus mehili. Kadang kham cuma ngen-nah ke-khugian dunia gawoh, padahal Allah lagi ngebukak ko keuttungan di akhirat.”
Pak Ahmad tehan-ning, suwa mata ni meddu ko tuppukan putti di depan ni.
“Tapi ustadz…, jujur gawoh, kadang pekhasaan kesol dihati pagun luwah.”
“Ina wajar. Tapi dang sappai kham busuk hati jama Allah. Sebab setiap kejadian pasti wat hikmah ni.”
Beliau nekhusko,
“Dapok jadi Allah lagi ngelatih kesabakhan bapak. Dapok jadi Allah lagi ngegugurko dusa bapak. Atau Allah lagi ngejuk pahala sedekah tanpa bapak sadakhi.”
Angin pagi mehayu ngehembus lalun. Bulung-bulung putti dibelakang wakhung begekhak lalun.
Pak Ahmad nyengih.
“Lamon gohna…, ikam mekhattok nanom putti luwot, ustadz,”
“Nah, hallaw ina, tim-mbal ustadz suwa nyengih.
“Nanom ina kekhaj-jaan mulia. Selama pagun bermanfaat guway jelema khik makhluk Allah sai bakhih, dang bekhadu berbuat betik, ulah anjak lekot kecewa.”
Pak Ahmad ngangguk mantap.
“Du’ako ya ustadz. Mudah-mudahan ikam dapok lebih ikhlas.”
“Insya Allah.” Tim-mbal Ustadz.
Tekhus ustadz temegi suwa cawa.
“Gatta nyak ngebeli khua gandeng ya Pak Ahmad. Segandeng putti am-mbun, segandeng putti kepok.”
Tiyan khua pekhadda lalang.
Matakhani tambah cakak, cahaya ni han-ndop nyinari sudut-sudut tiyuh. Ustadz Munawwar ngelajuko jogging ni, sedongko Pak Ahmad medduko kebun lunik di belakang mahan ni jama hati sai lebih tenang.
Kadang sai kham anggap khugi, justru di sisi Allah inalah khanglayan menuju keberkahan. (*/300)
WaAllahu A’lam
_____
📚 H. Komiruddin Imron, Lc
✒️Shabahul_Khair
📚 Cekhita Lappung
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.