nataragung.id – Teginenong – Pagi ina, suasana mahan Ustadz Munawar tekhasa tenang. Cahaya matakhani menembus sela-sela bulung mang-nga di tekhab-bah mahan ni. Manuk-manuk lunik bekicau lembut, seakan nutuk nyam-buk mehayu sai penuh berkah.
Tiba-tiba bunyi Handphone ni mecoh ko kesunyian.
“Assalamu’alaikum, Ustadz.”
“Wa’alaikumussalam. Sapa niku?” lulih Ustadz Munawwar.
“Muhsin, Ustadz. Insya Allah jemoh pagi sekanuwa jama pengukhus Yayasan Maju Sejahtera haga silaturahmi guk mahan Ustadz, api dapok Ustadz?”
“Dapok. Jam pitu gawoh ya.” jawab ustadz singkat tapi ramah.
Jemoh pagi ni, pengukhus Yayasan Maju Sejahtera kak mejong di ruang temui mahan Ustadz Munawar. Di mija kak tesaji teh angat jama putti gukhing. Pudak tiyan tenah-han serius tapi tetop semangat.
Mas Muhsin mulai bebalah.
“Gohiji Ustadz, wat jama’ah sai nitipko duit eppak khatus juta guk yayasan ikam. Ikam haga kilu nasihat ustadz, picawi betik ni amanah sebalak ina ikam kelola?”
Ustadz Munawwar nyengih nengis balahan ina.
“Alhamdulillah…., sina nikmat sai balak anjak Allah. Ingok yu…., kaban jelema makin pekhacaya jama yayasan lamun yayasan ina ngejaga amanah khik terbuka atawa transparan delom pengelolaan duit anjak ummat.”
Mas Muhsin ngangguk.
“Selama iji Ikam selalu berusaha terbuka Ustadz. Unyin pemasukan jama pengeluwahan, Ikam musyawarah ko jama kaban pengukhus yayasan, khadu sina Ikam laporko jama donatur,”
Ustadz Munawar tambah nyengih.
“Sinalah modal paling balak delom organisasi. Keterbukaan jama kejujuran. Lamun ina dijaga. In Syaa Allah berkah Allah khag-goh guk kuti.”
Beliau tekhus ngelaju ko nasihat ni.
“Pertama, duit ina dang di pegung ketua yayasan. Sekhahko gawoh jama bendahara. Ketua cukup ngawasi jama memastiko penggunaan duit kak sesuai jama keputusan musyawarah. Sebab lamun pemimpin ngating duit pesayyan, tanpa wat sai ngawasi kha-ngok fitnah anjak dipa-dipa pasti tebukak.”
Kaban pengukhus bela setinuk’an tekhus ngangguk-anggukko hulu tiyan.
“Kedua,” lanjut ustadz, ” geluk laksanakon musyawarah tentang pembagian kegunaan duit sina. Tattu ko program kekhaj-ja sai jelas. Dang ngedok penggunaan duit sai mak di setujui jama-jama.”
Ustadz han-ning sekhab-bok, tekhus cawa agak lalun.
“Ingok…. Sina layin duit pribadi. Sina duit ummat. Pertanggungjawabanni layin cuma di dunia, tapi jama Allah Ta’ala munih.”
Tekhus ustadz ngebacako firman Allah:
«وَمَنْ كَانَ غَنِيًّا فَلْيَسْتَعْفِفْ ۖ وَمَنْ كَانَ فَقِيرًا فَلْيَأْكُلْ بِالْمَعْرُوفِ ۚ فَإِذَا دَفَعْتُمْ إِلَيْهِمْ أَمْوَالَهُمْ فَأَشْهِدُوا عَلَيْهِمْ ۚ وَكَفَىٰ بِاللَّهِ حَسِيبًا»
Khat-ti ni: “Barangsapa (diantara pemelihara ina) sang-ngup, maka hendaklah ia nahan dikhi (anjak nganik khatta anak yatim ina). Khik barangsapa miskin, maka dapoklah ia ngakuk sekadar ni, jama cakha sai patut. Lamun niku nyerahko khatta jama tiyan, khatong ko lah saksi-saksi. Khik cukuplah Allah sebagai Pengawas.” (QS. An-Nisa’: 6).
Tekhus beliau ngejelaskon,
“Pengelola dana ummat ina, ibarat pengelola khatta anak yatim. Sai mampu wajib ngejaga dikhi, dang nggunako guway kepentingan pribadi. Lamun sangun butuh, akuklah sekadar ni, dang berlebihan.”
Suasana ruang temui jadi hening. Nasihat anjak Ustadz kukhuk sappai guk delom hati tiyan.
Mas Muhsin cawa lalun,
“Jazakallahu khairan, Ustadz. Ikam sadar amanah ina biyak. In Syaa Allah Ikam haga jaga sebetik-betik ni.”
Ustadz Munawwar nyengih luwot.
“Jagalah kepekhcayaan ummat. Sebab sekali gawoh amanah dikhianati, kepekhcayaan dapok lebon sappai kapan juga.”
Mak munni kaban pengukhus betang-ngoh mulang. Tiyan salaman jama ustadz sai-sai, tekhus mulang.
Mehayu tambah tekhang. Matakhani tambah cakak. Cahaya ni nyinari bumi. Dibalik cahaya di mehayu ina, wat pelajakhan sai bekhag-ga: organisasi layin di teg-gi ko anjak nayah ni duit, tapi diteg-gi ko jama amanah, musyawarah khik keterbukaan.
Sebab lamun keterbukaan lebon, kecurigaan pasti tuwoh. Tapi lamun amanah dijaga, Allah pasti ngekhag-gohko keberkahan anjak langik jama bumi. (*/290)
WaAllahu A’lam
_____
📚 H. Komiruddin Imron, Lc
✒️Shabahul_Khair
📚 Cekhita Lappung
*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.